قرآن ہدایت ، شفاءاور نجات کا لازوال سر چشمہ(1)

قرآن مجید وہ عظیم الشان کتاب ہے جو اللہ جل شانہ نے انسانیت کی رہنمائی کے لیے نبی آخرالزماں نبی کریم روف الرحیمﷺ پر نازل فرمائی۔یہ کتاب نہ صرف مسلمانوں کے لیے بلکہ پوری انسانیت کے لیے ہدایت ، نور اور رحمت کا پیغام ہے بلکہ یہ ایک مکمل ضابطہ حیات ہے جو انسانوں کو زندگی کے ہر موڑ پر درست راستہ دکھاتا ہے۔قرآن مجید مردہ لوگوں کے لیے آب حیات اور پڑ مردہ دلوں کے لیے طمانیت بخش ہے۔یہ دلوں کے لیے شفا ہے۔انسان جتنی مرضی دنیاوی آسائشیں حاصل کر لے اگر اس کا دل بے سکون ہے تو زندگی بوجھ بن جاتی ہے۔قرآن مجید کی تلاوت اس پر غورو فکر اور اس کی تعلیمات پر عمل پیرا ہونے سے دلوں کو سکون اور قرار ملتا ہے۔حسد ، کینہ ، لالچ اور خوف و مایوسی جیسی بیماریوں کا حقیقی علاج قرآن مجید میں موجود ہے۔یہی وجہ ہے جو لوگ قرآن مجید سے جڑ جاتے ہیں ان کے دلوں میں ایک خاص طمانیت پیدا ہوتی ہے جو دنیا کی کسی دولت سے حاصل نہیں ہو سکتی۔ قرآن مجید لوگوں کو ان کے رب کے حکم سے تاریکی سے نکال کر روشنی کی طرف لاتا ہے اور صراط مستقیم پر گامزن کرتا ہے۔ جس کا قول قرآن مجید کے مطابق ہے وہ صادق ہے اور جو اس کے احکامات پر عمل پیرا ہوتا ہے وہ کامیاب ہے۔ قرآن مجید میں ارشاد باری تعالیٰ ہے : ’’ لوگو ! تمہارے پاس رب کی طرف سے نصیحت آ گئی ہے۔ یہ وہ چیز ہے جو دلوں کے امراض کی شفاءہے اور جو اسے قبول کر لیں ان کے لیے رہنمائی اور رحمت ہے۔اے نبیﷺ کہہ دو کہ یہ اللہ کا فضل اور مہربانی ہے کہ یہ خبر اس نے بھیجی۔ اس پر تو لوگوں کو خوش ہونا چاہیے‘‘۔سورۃ اسراءمیں اللہ تعالیٰ ارشاد فرماتا ہے : ’’ یقینا یہ قرآن وہ راستہ دکھاتا ہے جو بہت ہی سیدھا ہے اور ایمان والوں کو جو نیک اعمال کرتے ہیں اس بات کی خوشخبری دیتا ہے کہ ان کے لیے بہت بڑا اجر ہے ‘‘۔دنیا میں جب فکری، اخلاقی اور روحانی تاریکیاں چھا جائیں تو قرآن ہی وہ چراغ ہے جو دل و دماغ کو منور کرتا ہے۔ یہ انسان کو یہ شعور دیتا ہے کہ وہ محض ایک جسم نہیں بلکہ ایک ذمہ دار روح ہے جس نے اپنے رب کے حضور جواب دہ ہونا ہے۔قرآن مجید انسان کو اس کی اصل پہچان یاد دلاتا ہے اوراسے مقصد حیات سے آشنا کرتاہے۔ ارشاد باری تعالیٰ ہے : بیشک جو اللہ تعالیٰ کی کتاب کی تلاوت کرتے ہیں اور نماز قائم کرتے ہیں اور اس مال سے خرچ کرتے ہیں جو ہم نے ان کو دیا رازداری سے اور اعلانیہ وہ ایسی تجارت کے امید وار ہیں جو ہرگز نقصان والی نہیں۔ (سورۃ فاطر)۔