انفاق فی سبیل اللہ (۱)

مال و دولت اللہ تعالی کی عطا کردہ نعمت اور انسان کے لیے ایک آزمائش ہے ۔ اس دولت کا حقیقی حُسن اس وقت نمایاں ہوتا ہے جب انسان اسے صرف اپنی آسائشوں تک محدود رکھنے کے بجائے دوسروں کی ضرورتوں اور بھلائی کے لیے بھی خرچ کرتا ہے ۔

 انفاق فی سبیل اللہ دراصل ایثار ، اخلاص اور بندگانِ خدا سے محبت کا عملی اظہار ہے۔ قرآن مجید اور احادیث میں اس عمل کو ایمان کی علامت قراردیتے ہوئے بے شمار اجرو ثواب کی بشارت دی ہے ۔ یہی وہ نیک عمل ہے جو مال کو پاکیزگی ، دل کو وسعت اور  معاشرے کو ہمدردی و محبت عطا کرتا ہے ۔ متقی لوگوں کی صفات بیان کرتے ہوئے اللہ تعالی نے ارشاد فرمایا :”وہ جو بے دیکھے ایمان لائے اور نماز قائم رکھیں اور ہمارے دیے ہوئے رزق میں سے کچھ ہماری راہ میں خرچ کرتے ہیں “۔ (البقرہ :آیت ۳)

اور جو لوگ اللہ تعالی کی راہ میں اپنا مال خالص اللہ تعالی کی رضا کے لیے خرچ کرتے ہیں اللہ تعالی انہیں اس کا اجر سات سو گنا عطافرماتا ہے ۔ سورۃ البقرہ کی آیت ۱۶۲ ، ۲۶۲ اور ۳۶۲میں اللہ تعالی ارشاد فرماتا ہے : ” جو لوگ اپنے اموال اللہ کی راہ میں خرچ کرتے ہیں ان کی مثال اس دانہ کی طرح ہے جس نے اگائیں سات بالیں ہر بال میں سو دانے اور اللہ اس سے بھی زیادہ بڑھائے جس کے لیے چاہے اور اللہ وسعت والا علم والا ہے ۔وہ جو اپنے مال اللہ کی راہ میں خرچ کرتے ہیں پھر دیئے پیچھے نہ احسان رکھیں نہ تکلیف دیں ان کا نیگ ان کے رب کے پاس ہے اور انہیں نہ کچھ اندیشہ ہو نہ کچھ غم ۔ اچھی بات کہنا اور در گزر کرنا اس خیرات سے بہتر ہے جس کے بعد ستانا ہو اور اللہ بے پرواہ حلم والا ہے “۔ 

ان آیات مبارکہ میں اللہ تعالی فرماتا ہے کہ جب کچھ اللہ تعالی کی راہ میں دیا جائے تو اس پر احسان نہ جتلایا جائے اور نہ ہی تکلیف دی جائے ۔ اور اگر کچھ دینے کو نہ ہو تو اسے بُرا بھلاکہنے کی بجائے اچھی بات کی جائے اور خوش خلقی سے پیش آیا جائے یہ اس سے بہتر ہے جس خیرات کے دینے کے بعد کسی کو احسان جتلایا جائے ۔

حضرت ام بجیدہ ؓ نے نبی کریم ﷺ کی بارگاہ میں عرض کی یا رسول اللہ ﷺ ایک سائل آتا ہے جو میرے دروازے پر کھڑ ا ہو جاتا ہے میرے پاس اسے دینے  کو کچھ نہیں ہوتا ۔ آپ ﷺ نے فرمایا اگر تیرے پاس جلے ہوئے کھر کے سوا کچھ نہ ہو تو وہی اسے دے دو۔ ( ترمذی )۔

 

فسق و فجور(۳)

ارشاد باری تعالٰی ہے : کیا ایمان والوں کو ابھی وہ وقت نہ آیا کہ ان کے دل جھک جائیں اللہ کی یاد اور اس حق کے لیے جو اترا اور ان جیسے  نہ ہوں جن کو پہلے کتاب دی گئی پھر ان پر مدت دراز ہوئی تو ان کے دل سخت ہو گئے اور ان میں بہت فاسق ہیں ۔( سورۃ الحدید :آیت۱۶)۔

حضرت نافع رضی اللہ عنہ فرماتے ہیں کہ حضرت عبد اللہ بن عمر رضی اللہ عنہ جب بھی اس آیت مبارکہ کی تلاوت کرتے تو آپ کی آنکھوں  سے آنسو جاری ہو جاتے اور اتنا روتے کہ آپ بے حال ہو جاتے ۔ ( ابن عساکر )۔

سورۃ الحشر آیت نمبر ۱۹ میں  ارشاد باری تعالی ہے : اور ان جیسے نہ ہو جو اللہ کو بھول بیٹھے تو اللہ نے انہیں بلا میں ڈالا کہ اپنی جانیں یاد نہ رہیں وہی فاسق ہیں ۔

اللہ تعالی ایمان والوں کو مخاطب کرتے ہوئے ارشاد فرماتا ہے کہ تم منافقوں کی طرح نہ ہو جانا جنہوں نے اللہ تعالی کے حقوق کو بھلا دیا تو  اللہ تعالی نے انہیں اپنی جانوں کو بھول جانے والا بنا دیا کہ وہ اس بات کو نہیں سنتے جو انہیں نفع دے اور نہ ہی وہ کام کرتے ہیں جس سے  انہیں نجات ملے ۔ اللہ تعالی فرماتا ہے یہی لوگ کامل فاسق ہیں ۔ 

حضرت عبد اللہ بن مسعود رضی اللہ عنہ سے مروی ہے کہ نبی کریم ﷺ نے ارشاد فرمایا مسلمان کو گالی دینا فسق اور اس سے جھگڑاکرنا کفر ہے ۔ ( بخاری شریف)۔

نبی کریم ﷺ نے ارشاد فرمایا : اس مومن کی مثال جو قرآن پڑھتا ہے ترنج کی سی ہے کہ اس کا مزہ بھی اچھا ہے اور اس کی خوشبو بھی عمدہ ہے  اور وہ مومن جو نہیں پڑھتا ہے کھجور کی طرح ہے کہ اس کا مزہ تو اچھا ہے لیکن اس میں خوشبو نہیں ہے ۔ اور فاسق کی مثال جو قرآن پڑھتا ہے  اس کی مثال مردہ ریحانہ پھول کی طرح ہے جس کی خوشبو تو اچھی ہے لیکن اس کا مزہ کڑوا ہے اور فاسق جو قرآن نہیں پڑھتا اس کی مثال اندرائن کی طرح ہے جس کا مزہ بھی کڑوا ہے اور خوشبو بھی نہیں ہے ۔ (بخاری )۔

لیکن اس کے ساتھ ساتھ کسی کے اوپر فسق و فجور اور کفر کے فتوے لگانے سے پہلے خوب تحقیق کر لینی چاہیے ۔نبی کریم ﷺ نے ارشاد فرمایا کہ اگر کوئی شخص کسی شخص کو کافر یا فاسق کہے اور وہ در حقیقت کافر یا فاسق نہ ہو تو کہنے والا فاسق اور کافر ہو جائے گا ۔ ( بخاری شریف )۔

 

فسق و فجور(۲)

سورۃ النور آیت نمبر ۴ میں اللہ تعالی ارشاد فرماتا ہے : اور جو پارسا عورتوں کو عیب لگائیں پھر چار گواہ معائنہ کے نہ لائیں تو انہیں اسی کوڑےلگاؤ اور ان کی کوئی گواہی کبھی نہ مانو اور وہی فاسق ہیں ۔ 

یعنی جو لوگ پاکدامن عورتوں پر بد کرداری کی تہمت لگائیں اور پھر اسے ثابت کرنے کے لیے چار گواہ نہ لاسکیں تو ان کو اسّی کوڑے مارے جائیں اور ان کی گواہی کسی بھی چیز میں نہ مانی جائے کیونکہ یہ لوگ فاسق ہیں ۔ ارشاد باری تعالی ہے : اے ایمان والو اگر کوئی فاسق تمہارے پاس کوئی خبر لائے تو تحقیق کر لو کہ کہیں کسی قوم کو ان جانے میں ایذا نہ دے بیٹھوپھراپنے کیے پر پچھتاتے رہ جائو ۔ ( سورۃ الحجرات :آیت ۶)

اللہ تعالی اہل ایمان کو تلقین فرما رہا ہے کہ اگر کوئی فاسق تمہارے پاس کوئی خبر لے کر آئے تو اس کی تحقیق لازمی کر لیا کریں کیونکہ جو بندہ فسق سے نہ بچ سکا وہ جھوٹ سے بھی نہیں بچے گا ۔

سورۃ الحجرات ہی کی آیت ۱۱ میں اللہ تعالی ارشاد فرماتا ہے : اے ایمان والو نہ مرد مردوں پر ہنسیں عجب نہیں کہ وہ ان ہنسنے داخل ہونے والوں سے بہتر  ہوں اور نہ عورتیں عورتوں سے دور نہیں کہ وہ ان ہنسنے والیوں سے بہتر ہوں اور آپس میں طعنہ نہ کرو اور ایک دوسرے کے بُرے نام نہ رکھو کیا ہی بُرا نام ہے مسلمان ہو کر فاسق کہلانا اور جو توبہ نہ کریں تو وہی ظالم ہیں ۔ 

مسلمان کو طعنہ دینا ، اس کا مذاق اڑانا مشرکوں کا کام ہے لیکن آج کل مسلمانوں میں یہ عادت عام ہو چکی ہے ۔ حضور نبی کریم ﷺ نے بھی کسی مسلمان بھائی کا مذاق اڑانے اور اسے شرمندہ کر نے سے منع فرمایا ہے ۔ 

حضرت معاذ بن جبل رضی اللہ عنہ سے مروی ہے کہ نبی کریم ﷺ نے ارشاد فرمایا جس شخص نے اپنے بھائی کو اس کے کسی گناہ پر شرمندہ کیا تووہ اس وقت تک نہیں مرے گا جب تک کہ وہ اس گناہ کا ارتکاب نہ کر لے ۔ ( ترمذی )

ام المئومنین حضرت عائشہ صدیقہ رضی اللہ عنہا سے مروی ہے کہ نبی کریم ﷺ نے فرمایا میں کسی کی نقل اتارنا پسند نہیں کرتا اگر چہ اس کے بدلےمیں مجھے بہت مال ملے ۔( ابو دائود )

سورۃ الذٰ ریٰت میں اللہ تعالی ارشاد فرماتا ہے : اور ان سے پہلے قوم نوح کو ہلاک فرمایا بیشک وہ فاسق لوگ تھے ۔ ( آیت : ۴۶)

قوم نوح نے اللہ تعالی کے احکامات کی نافرمانی کی اور اس کی قائم کردہ حدود کو توڑا تو اللہ تعالی نے ان کے کفر اور گناہوں کے بدلے انہیں ہلاک کر دیا۔

 

فسق و فجور(۱)

فسق کے لغوی معنی حدود سے نکل جانے کے ہیں جبکہ دینی اصطلاح میں اللہ تعالی کی اطاعت سے انحراف ، اس کے احکام کی نافرمانی اور گناہوں پر اصرار کرنا فسق کہلاتا ہے ۔فجور سے مراد اخلاقی حدود کو توڑنا ، بدکرداری اختیار کرنا اور گناہوں میں بے باکی کا مظاہرہ  کرنا ہے ۔ دونوں کا بنیادی تعلق انسان کے اس رویے سے ہے جس میں وہ اللہ تعالی کی ہدایات کو نظر انداز کر کے اپنی خواہشات کو  ترجیح دیتا ہے ۔ 

ارشاد باری تعالی ہے : اس سے بہت سوں کو گمراہ کرتا ہے اور بہت سوں کو را ہ راست دکھاتا ہے اور اس سے انہیں گمراہ کرتا ہے جو بے حکم (فاسق ) ہیں۔ ( البقرہ: آیت ۶۲)۔ یعنی قرآن مجید فرقان حمید پڑھنے سے اللہ تعالی بہت سے لوگوں کو ہدایت عطا فرماتا ہے اور بہت سے ایسے ہیں جو اس کتاب کو پڑھ کر ہدایت نہیں پاتے وہ ایسے لوگ ہیں جو اللہ تعالی کے حکم کو نہیں مانتے ۔ 

سورۃ البقرہ کی آیت ۹۹ میں اللہ تعالی ارشاد فرماتا ہے : اور بیشک ہم نے تمہاری طرف روشن آیتیں نازل کیں اور ان کے منکر نہ ہوں گے مگر فاسق لوگ۔ 

یعنی اللہ تعالی نے قرآن مجید میں حلال ، حرام اور حدود وغیرہ کے تمام احکام نازل فرمائے ہیں اور صرف وہی لوگ ان کو نہیں مانتے جو  اللہ تعالی کے احکامات کی اطاعت نہیں کرتے ۔ 

سورۃ المائدہ میں اللہ تعالی ارشاد فرماتا ہے : اور چاہیے کہ انجیل والے حکم کریں اس پر جو اللہ نے اس میں اتارا اور جو اللہ کے اتارے  پر حکم نہ کریں تو وہی لوگ فاسق ہیں ۔( آیت :۷۴)۔

سورۃ المائدہ ہی کی آیت نمبر ۱۸ میں اللہ تعالی ارشاد فرماتا ہے : اور اگر وہ ایمان لاتے اللہ اور ان نبی پر اور اس پر جو ان کی طرف اترا تو کافروں سے دوستی نہ کرتے مگر ان میں بہتیرے فاسق ہیں ۔  سورۃ التوبہ میں اللہ تعالی ارشاد فرماتا ہے : تمہارے آگے قسمیں کھاتے ہیں کہ تم ان سے راضی ہو جاؤ تو اگر تم ان سے راضی ہو جاؤ تو  بیشک اللہ تو فاسق لوگوں سے راضی نہ ہو گا ۔ ( آیت : ۶۹)۔

یعنی جو کافر لوگ ہیں وہ مسلمانوں کی رضا حاصل کرنے اور نفع حاصل کرنے کے لیے قسمیں کھاتے ہیں لیکن اللہ تعالی ان کے کفر و نفاق کو جانتا ہے وہ ان سے کبھی راضی نہ ہو گا ۔ جھوٹی قسمیں کھانا منافقین کا کام ہے اور جو لوگ جھوٹی قسمیں کھاتے ہیں وہ لوگ فاسق ہیں ۔*

 

رحمتِ الٰہی (۲)

حضرت سیدنا انس بن مالک رضی اللہ تعالی عنہ سے مروی ہے حضور نبی کریم ﷺ نے ارشاد فرمایا : اللہ تعالی فرماتا ہے اے آدم کے بیٹے جب تک تو مجھ سے دعائیں کرتا رہے گا اور مجھ سے اپنی توقعات وابستہ رکھے گا میں تجھے  بخشتا رہوں گا ، چاہے تیرے گناہ کسی بھی درجہ پر پہنچے ہوئے ہوں مجھے کسی بات کی پرواہ نہیں ہے ، اے آدم کے بیٹے اگر تیرے گناہ آسمان کو چھونے لگیں پھر تو مجھ سے مغفرت طلب کرے تو میں تجھے بخش دوں گا اور مجھے کسی بات کی پرواہ نہیں ۔ اے آدم کے بیٹے ! اگر تو زمین برابر بھی گناہ کر بیٹھے اور پھر مجھ سے مغفرت طلب کرنے کےلیے ملے لیکن میرے ساتھ کسی کو شریک نہ کیا ہو تو میں تیرے پاس اس کے برابر مغفرت لے کر آؤں گا اور تجھے بخش دوں گا ۔ ( ترمذی )۔

حضرت سیدنا ابو موسی اشعری رضی اللہ تعالی عنہ سے مروی ہے حضور نبی کریم ﷺ نے ارشاد فرمایا : قیامت کے دن مسلمانوں میں کچھ لوگ پہاڑوں کے برابر گناہ لے کر آئیں گے اللہ تعالی ان کو بخش دے گا اور ان گناہوں کو یہود اور نصاری پر ڈال دے گا ۔ (صحیح مسلم )۔

 حضرت سیدنا ابو سعید خدری رضی اللہ تعالی عنہ سے مروی ہے حضور نبی کریم رؤ ف الرحیم ﷺ نے ارشاد فرمایا :  شیطان نے کہا اے رب ! مجھے تیری عزت کی قسم میں تیرے بندوں کو تب تک بہکاتا رہوں گا جب تک ان کی روحیں ان کے جسموں میں رہیں گی ۔ اس پر اللہ تعالی نے فرمایا : مجھے میری عزت اور بزرگی کی قسم میں تب تک ان کی بخشش کرتا رہوں گا جب تک وہ مجھ سے مغفرت طلب کرتے رہیں گے ۔ ( مسند احمد)۔ ارشاد باری تعالی ہے : اور جو شخص کوئی برا کام کرے یا اپنی جان پر ظلم کرے پھر وہ اللہ سے مغفرت طلب کرےتو وہ اللہ کو بہت بخشنے والا نہایت مہربان پائے گا ۔ ( سورۃ النساء)۔

حضرت ابو ہریرہ رضی اللہ تعالی عنہ سے مروی ہے حضور نبی کریم ﷺ نے ارشاد فرمایا : قسم اس ذات کی جس کے قبضہ قدرت میں میری جان ہے اگر تم گناہ نہ کرو تو اللہ تعالی تم کو فنا کر دے گا اور ایسے لوگوں کو پیدا کرے جو گناہ کریں ، پھر اللہ تعالی سے بخشش مانگیں اور اللہ تعالی انہیں بخش دے گا ۔(صحیح مسلم)۔ حضرت سلمان فارسی رضی اللہ تعالی عنہ سے مروی ہے حضور نبی کریم ﷺ نے ارشاد فرمایا : بیشک اللہ تعالی کے پاس سو رحمتیں ہیں ۔ ان میں سے ایک وہ رحمت ہے جس کی وجہ سے مخلوق ایک دوسرے پر رحم کرتی ہے جب کہ ننانوے رحمتیں قیامت کے دن کے لیے محفوظ ہیں ۔ ( صحیح مسلم )۔

 

رحمتِ الٰہی (۱)

 رسول کریمﷺ نے فرمایا : اللہ تعالی فرماتا ہے جو شخص نیکی کرے اس کے لیے دس نیکیاں ہیں اور میں اسے بڑھاتا ہو ں اور جو برائی کرے تو اس کے بدلے ایک ہی برائی ہے یا میں اسے معاف کر دیتا ہوں اور جو شخص مجھ سے ایک با لشت نزدیک ہوتا ہے میں اس سے ایک ہاتھ نزدیک ہوتا ہوں اور جو مجھ سے ایک ہاتھ نزدیک ہوتا ہے میں اس سے دونوں کھلے بازوؤں کے برابر نزدیک ہوتا ہوں اور جو میرے پاس چلتا ہوا آتا ہے میں اس کے پاس دوڑتا جاتا ہوں اور جو مجھ سے ملے زمین بھر کے گناہوں کے ساتھ لیکن شرک نہ کرتا ہو تو میں اتنی ہی بخشش کے ساتھ اس سے ملوں گا ۔(صحیح مسلم)۔ رسول کریمﷺ نے فرمایا: بے شک اللہ تعالی فرماتا ہے ! اے میرے بندو میں نے ظلم کو اپنے اوپر حرام کیا اور تم پر بھی حرام کیا ، تو تم آپس میں ایک دوسرے پر ظلم نہ کرو ۔ اے میرے بندو تم سب گمراہ ہو مگر جس کو میں ہدایت دوں پس تم سب مجھ سے ہدایت مانگو میں تمہیں ہدایت دوں گا۔اے میرے بندو ! تم سب بھوکے ہو مگر جس کو میں کھانا کھلاؤں تو مجھ سے کھانا مانگو میں تم کو کھلاؤں گا ۔ اے میرے بندو تم سب ننگے ہو مگر جس کو میں کپڑا پہناؤں ، تو مجھ سے کپڑا مانگو میں تم کو پہناؤں گا ۔ اے میرے بندوتم رات دن گناہ کرتے ہو اور میں سب گناہوں کو بخشتا ہو ں ، تو تم مجھ سے بخشش مانگو میں بخشوں گا تم کو ۔ اے میرے بندو!تم میرا نقصان نہیں کر سکتے اور نہ ہی مجھ کو فائدہ پہنچا سکتے ہو ، اگر تمہارے اگلے اور پچھلے ، انسان اور جنات سب ایسے ہو جائیں جیسے تمہارا بڑا پر ہیز گار شخص تو میری سلطنت میں کچھ اضافہ نہ ہو گا اور اگر تمہارے اگلے اور پچھلے ، انسان اور جنات سب ایسے ہو جائیں جیسے تمہارا بڑا بدکار شخص ہو تو میری سلطنت میں کچھ کم نہ ہو گا ۔

 اے میرے بندو اگر تمہارے اگلے اور پچھلے انسان اور جنات سب ایک میدان میں کھڑے ہوں پھر بھی مجھ سے مانگنا  شروع کریں اور میں ہر ایک کو جو مانگے دے دوں تب بھی میرے پاس جو کچھ ہے وہ کم نہ ہوگا مگر اتنا جیسے سمندر میں سوئی ڈبو کر نکال لو ۔ اے میرے بندو یہ تو تمہارے ہی اعمال ہیں جن کو تمہارے لیے شمار کرتا رہتا ہوں ، پھر تم کو ان اعمال کا پورا بدلہ دوں گا ، سو جو شخص بہتر بدلہ پائے تو چاہیے کہ اللہ تعالی کا شکر کرے کہ اس کی کمائی بیکار نہ گئی اور جو برا بدلہ پائے تو اپنے ہی تئیں برا سمجھے ۔ (صحیح مسلم )۔

 

خیرالتابعین سیدنا اویس قرنیؓ

 تقوی و پرہیز گاری کا عالم یہ تھا کہ ساری زندگی بوسیدہ جھونپڑی میں گزار دی ۔ آپ ؓ فرماتے اے اللہ میں تجھ سے بھوکے جگر اور ننگے بدن کی معافی چاہتا ہوں ۔ جو لباس میں نے پہنا ہے اور جو غذا میرے پیٹ میں ہے اس کے علاوہ میرے پاس کچھ نہیں ۔ ( تذکر ةلاولیا )۔

حضور نبی کریم ﷺ جب صحابہ کے سامنے حضرت اویس قرنی ؓ کا ذکر کرتے تو صحابہ نے عرض کی ہم میں سے ان کی ملاقات کا کوئی شرف حاصل کر  سکے گا۔ آپﷺ نے فرمایا عمرؓ اور علی ؓکی ان سے ملاقات ہو گی اور ان کی پہچان یہ ہے کہ ان کے پورے جسم پر بال ہیں اور ہتھیلی کے بائیں پہلو پر ایک درہم کے برابر سفید رنگ کا داغ ہے ۔  حضرت عمر رضی اللہ عنہ دس سال سیدنا اویس قرنی کی تلاش میں رہے اور آخر کار سیدنا فاروق اعظم ؓ کو جب حضرت اویس قرنی کے متعلق معلوم ہوا تو  حضرت عمر اور حضرت علی جب وہاں پہنچے تو حضرت اویس قرنی نماز پڑھ رہے تھے۔ جب نماز سے فارغ ہوئے تو ان کا نام دریافت کیا گیا تو آپ نے فرمایا عبدا للہ یعنی اللہ کا بندہ۔ توحضرت عمر نے کہا عبداللہ تو سب ہی ہیں آپ اپنا اصلی نام بتائیں ۔ تو آپ نے فرمایا اویس ۔پھرحضرت عمر نے کہا کہ اپنا ہاتھ دکھائیں آپ نے ہاتھ دکھایا تو جو نشانی نبی اکرم ﷺ نے بتائی تھی وہ نشانی موجود تھی ۔

 حضرت عمر نے جب وہ نشانی دیکھی تو نبی کریم ﷺ کا پیراہن مبارک دیا اور حضو ر ﷺکا سلام بھی پیش کیا ۔اور حضور ﷺ کی امت کے حق  میں دعا کرنے کا پیغام دیا ۔ حضرت اویس قرنی نے کہا اے عمر تمہاری عمر مجھ سے بہتر ہے اور فرمایا کہ میں تو دعا کرتا ہی رہتا ہوں۔ حضرت عمر نے فرمایا لیکن آپ کو دعا کرنے کا حکم ملا ہے۔  حضرت اویس قرنی نے حضور ﷺ کا جبہ مبارک تھوڑی دور لے جا کر اللہ تعالی سے دعا کی اے اللہ تعالی میں اس وقت تک حضور ﷺ کا جبہ مبارک  نہیں پہنوں گا جس وقت تک ساری امت کی بخش نہیں ہو جاتی ۔ دعائے مغفرت کے لیے یہ تیرے حبیب کی وصیت ہے پس تو میری التجا سن لے ۔ (تذکرۃ الاولیا )۔

حضرت سیدنا اویس قرنی زندگی کے آخری بیس سال گوشہ گمنامی میں رہے ۔آپ ؓ کو اللہ تعالی کی راہ میں شہید ہونے کی بڑی تمنا تھی اس لیے اللہ تعالی  سے شہادت کی موت کی دعائیں کرتے تھے۔اللہ تعالی نے آپ ؓ کی دعا کو قبول فرمایا اور حضرت علی ؓ کے عہد خلافت میں حضرت علی رضی اللہ عنہ کے  ساتھ جنگ صفین میں شامل ہوئے اور جام شہادت نوش فرمایا ۔

حضرت اویس قرنی ؓ کی شخصیت صبر ، وفا ، ایثار اور محبت رسول ﷺ کا حسین امتزاج ہے ۔آپ نے خواہشات کو اللہ تعالی کی رضا پر قربان کیا ، والدہ  کی خدمت کو عبادت سمجھا ، شہرت سے کنارہ کش رہے اور اخلاص کو اپنی زندگی کا شعار بنایا ۔