استقبال رمضان(2)

جیسے گھر میں مہمان کے آنے سے قبل گھر کی صفائی ستھرائی کی جاتی ہے اسی طرح ہمیں اپنے معمولات زندگی کو بھی ماہ رمضان سے قبل درست کرنا ضروری ہے۔ فضول مصروفیات ، لغویات ، فضول گفتگو ، جھوٹ اور گناہوں سے دوری اختیار کی جائے اور آئندہ زندگی میں بھی ان باتوں سے بچنے کا عہد کرنا چاہیے۔ 

نبی کریم رئوف الرحیم ﷺ نے ارشاد فرمایا : جو شخص روزہ رکھے اور جھوٹ بولے اور بْرے کام نہ چھوڑے تو اللہ تعالیٰ کو اس کے بھوکا پیاسا رہنے کی کوئی حاجت نہیں۔ماہ مقدس سے پہلے اللہ تعالیٰ کی بارگاہ میں مناجات پیش کریں اور اپنے گناہوں سے معافی مانگیں اور آئندہ گناہوں سے بچنے کا عہد کریں۔ ابھی سے ہی قرآن مجید کی تلاوت کا معمول بنائیں اور کو شش کریں کہ ما ہ رمضان میں قرآن مجید کو بمع ترجمہ و تفسیر پڑھیں۔ ماہ رمضان کی آمد سے قبل ہی خود کو نوافل اور ذکر و اذکار کا عادی بنائیں تا کہ ہم ماہ مقدس میں مزید فرائض کے ساتھ ساتھ نفلی عبادت اور ذکر و اذکار میں مشغول ہو سکیں۔ ماہ مقدس کی آمد سے پہلے مناسب غذا کا استعمال کریں اور اپنی صحت کا خیال رکھیں تا کہ ہم رمضان سے قبل یا ماہ مقدس میں بیمار نہ ہوں۔ اس بات کی نیت کریں کہ رمضان المبارک میں اللہ تعالیٰ کی رضا کے لیے قیام اللیل کریں گے ، دل کھول کر صدقہ و خیرات کریں گے اور اگر اللہ تعالیٰ نے ہمت و توفیق دی تو ان شاء اللہ اعتکاف بھی بیٹھیں گے۔ اور ماہ رمضان کے آخری عشرہ میں طاق راتوں میں شب قدر کی تلاش کریں گے۔ اگر ہم آج ہی ان نیک اعمال کی نیت کر لیں تو اللہ تعالیٰ کی رحمت سے ثواب ملے گا۔اس ماہ مقدس میں نوافل ادا کرنے کا ثواب فرضوں کے برابر ہے اور ایک فرض ادا کرنے کا ثواب ستر فرائض کے برابر ملتا ہے۔یہ صبر کا مہینہ ہے اور صبر کا بدلہ جنت ہے۔ یہ ہمدردی اور غم خواری کا مہینہ ہے اور یہی وہ مہینہ ہے جس میں اللہ اپنے بندوں کے رزق میں اضافہ کر دیتا ہے۔ماہ رمضان محض بھوکے پیاسے رہنے کا نام نہیں بلکہ تبدیلی کا موقع ہے۔رمضان المبارک اللہ تعالیٰ کی طرف سے ایک عظیم نعمت ہے جو ہمیں اپنی زندگیوں کو سنوارنے اور آخرت کی تیاری کرنے کا موقع فراہم کرتا ہے۔ہمیں چاہیے کہ ہم اس ماہ مقدس کا جتنا ہو سکے ادب و احترام کریں اور اس کی با برکت ساعتوں سے بھرپور مستفید ہوں۔ اللہ پاک ہمیں ماہ مقدس کی برکتوں کو سمیٹنے کی تو فیق عطا فرمائے۔ آمین۔