اللہ تعالیٰ کی نعمتیں (2)
اور بیشک تمہارے لیے چوپایوں میں بھی عبرت ہے کہ ان کے پیٹوں میں جو گوبر اور لہو ہے اس سے ہم تم کو خا لص دودھ پلاتے ہیں جو پینے والوں کے لیے خوشگوار ہے۔ اور کھجور اور انگور کے پھلوں میں سے کہ اس سے تم نبیذ بناتے ہو اور اچھا رزق بیشک اس میں نشانی ہے عقل والوں کے لیئے۔ اور تمہارے رب نے شہد کی مکھیوں کوحکم دیا کہ پہاڑوں میں گھر بنا اور درختوں میں اور چھتوں میں۔ پھر ہر قسم کے پھل میں سے کھا اور اپنے رب کی راہیں چل کہ تیرے لیے نر م و آسان ہیں اس کے پیٹ سے ایک پینے کی چیز رنگ برنگی نکلتی ہے جس میں لوگوں کی تندرستی ہے بیشک اس میں نشانی ہے سوچنے والوں کے لیے۔ (سورۃ النحل )۔
اور خدا ہی نے تمہارے لیے عورتیں پیدا کیں اور عورتوں سے بیٹے اور پوتے اور نواسے پیدا کیے اور تمہیں ستھری چیزوں سے روزی دی تو کیا جھوٹی بات پر یقین لاتے ہیں اور اللہ کے فضل سے منکر ہوتے ہیں۔( سورۃ النحل )۔
اور اللہ نے تمہیں تمہاری مائوں کے پیٹ سے پیدا کیا کہ تم کچھ نہیں جانتے تھے اور تمہیں کان اور آنکھ اور دل دیے کہ تم احسان مانو۔ کیا انہوں نے پرندے نہ دیکھے حکم کے باندھے آسمان کی فضا میں انہیں کوئی نہیں روکتا سوا خدا کے۔ بیشک اس میں نشانیاں ہیں ایمان والوں کے لیے۔ اور اللہ نے تمہارے لیے گھروں کو رہنے کی جگہ بنایا اور اسی نے چوپایوں کی کھالوں سے کچھ گھر بنائے جو تمہیں ہلکے پڑتے ہیں تمہارے سفر کے دن اور منزلوں پر ٹھہرنے کے دن اور ان کی اون اور ریشم اور بالوں سے کچھ گرستی کا سامان اور برتنے کی چیزیں ایک وقت تک۔ (سورۃ النحل)۔
اور اللہ نے تمہیں اپنی بنائی ہوئی چیزوں سے سائے دیے اور تمہارے لیے پہاڑوں میں چھپنے کی جگہ بنائی اور تمہارے لیے کچھ پہناوے بنائے کہ تمہیں گرمی سے بچائیں اور کچھ پہناوے کہ لڑائی میں تمہاری حفاظت کریں یونہی اپنی نعمت تم پر پوری کرتا ہے کہ تم فرمان مانو۔ پھر اگر وہ منہ پھیریں تو اے محبوب تم پر نہیں مگر صاف پہنچا دینا۔ اللہ کی نعمت کو پہنچاتے ہیں پھر اس سے منکر ہوتے ہیں اور ان میں اکثر کافر ہیں۔ (سورۃ النحل)۔
کیا تم نے نہیں دیکھا کہ خدا نے آسمان سے مینہ برسایا تو ہم نے اس سے طرح طرح کے رنگوں کے میوے اگائے۔اور پہاڑوں میں سفید اور سرخ رنگوں کے قطعات ہیں اور کچھ کالے سیاہ ہیں۔ ( سورۃ فاطر )
کیا ہم نے زمین کو بچھونانہیں بنایا ؟ اور پہاڑوں کو میخیں ؟ اور تمہیں جوڑے بنایا۔ اور نیند کو تمہارے لیے موجب آرام بنایا۔ اور رات کو مقرر کیا اور دن کو معاش کا وقت مقرر کیا۔( سورۃ النبا )۔
