رفعتِ تواضع
نبی کریم ﷺ نے خود بھی تواضع فرمائی اور اپنی امت کو بھی عاجزی ،انکساری اور تواضع کی تعلیم دی۔ ٭حضرت ابوہریرہ ؓروایت فرماتے ہیں۔حضوراکرم ﷺنے ارشاد فرمایا :’’جو صرف اللہ تعالیٰ کیلئے تواضع اختیار کرے اللہ تعالیٰ اس کا درجہ بلند کردیتا ہے۔ اور جو میانہ روی اختیار کرے اللہ اسے غنی کردیتا ہے اور جو اللہ تبارک وتعالیٰ کا ذکر کرتا ہے اللہ تعالیٰ اس سے محبت رکھتا ہے۔ (کنز العمال ) ٭حضرت انس ؓ فرماتے ہیں کہ صحابہ کرام کو جناب رسول ﷺسے بڑھ کر کوئی بھی شخص محبوب نہ تھا، لیکن جب آپ تشریف لاتے تو وہ تعظیم کیلئے کھڑے نہیں ہوتے تھے کیونکہ انھیں علم تھا کہ حضور سید الکونین ﷺ اس کام سے ناخوش ہوتے ہیں۔ (ترمذی )٭حضرت عیاض ؓروایت فرماتے ہیں کہ حضور اکرم ﷺنے ارشاد فرمایا ’’اللہ تعالیٰ نے میری طرف وحی بھیجی ہے کہ تم تواضع اختیار کرو، کوئی ایک دوسرے پر فخر نہ کرے اور کوئی کسی پر زیادتی نہ کرے۔(مشکوۃ)٭امیر المومنین عمر ابن خطاب ؓنے ایک دن خطبہ دیتے ہوئے ارشاد فرمایا لوگو تواضع اختیا ر کرو کیونکہ میں نے حضور رسالت پناہ ﷺسے سنا ہے کہ ’’جو شخص صرف اللہ تعالیٰ کیلئے تواضع اختیار کرتا ہے اللہ تعالیٰ اس کا رتبہ بلند کرتا ہے، گویا کہ وہ اپنے خیال میں حقیر ہوتا ہے ،لیکن لوگوں کی نظروں میں وقیع ہوتا ہے۔ اور جو شخص تکبر کرتا ہے لوگوں کی نظر میں حقیر ہوجاتا ہے اور خدا اس کا رتبہ پست کردیتا ہے ،یہاں تک کہ وہ لوگوں کی نظروں میں کتے اورخنزیر (جیسے جانوروں )سے بھی زیادہ ذلیل ہوجاتا ہے۔ (مشکوۃ ) ٭حضرت انس ؓ فرماتے ہیں کہ حضور حج کیلئے تشریف لے گئے میں نے دیکھا کہ آپ نے جو چادر مبارک زیب تن فرمائی ہوئی ہے اسکی قیمت محض چار درھم ہے ۔ایک با رحضور اکرم ﷺکے پاس کہیں سے چادریں آئیں آپ نے ان میں سے اکثر اسی وقت صحابہ کرام میں تقسیم فرمادیں۔ اور پھر اپنے کاشانہ اقدس میں تشریف لے گئے ۔کچھ دیر بعد حضور کے ایک صحابی حضرت مخزمہ اپنے بیٹے مِسَوّررضی اللہ عنہ کو ساتھ لئے ہوئے اپنا حصہ لینے کیلئے پہنچے ۔انھوں نے دیکھا کہ حضور اندر تشریف فرماہیں۔ حضر ت مخزمہ نے اپنے فرزند سے کہا، حضور کو آواز دے کر بلا لو، مسور نے کہا ابا جا ن میری کیا حیثیت ہے کہ میں رسول اللہ صلی اللہ علیہ وسلم کو آواز دوں ،مخزمہ نے کہا، میرے بیٹے رسول اللہ جباّر نہیں ہیں۔اس پر مسور نے ہمت کرکے حضور کو آواز دی ۔آپ فوراً باہر تشریف لے آئے اورانھیں دیبا کی ایک قبا عنایت فرمائی ۔
کوئی تبصرے نہیں:
ایک تبصرہ شائع کریں